Ooldeboorn

Et eerste optreden van dit jaor zit d’r op en et is allemaole prima verlopen. Ik kende alle teksten hiel goed en bin nargens stoekt en stroffeld. Ik was vandemiddag in et mooie Andringahuus in Ooldeboorn om te vertellen veur een koppeltien van twintig senioren die allemaole an iene lange taofel zatten. Zonder mikrefoon is dat wel even broekzetten. Ik was daor in 1993 en 1994 ok bi’j de bejaorden west te vertellen. Daornao bin ‘k in Ooldeboorn nog drie keer bi’j ’t Nut west. Dit groepien wodt ok al mar kleinder, dat ik zal wel niet meer in Ooldeboorn kommen te vertellen. Zo gaot et haost overal. Ik bin in wezen mit een ofscheidstoernee doende. Ik hope wel dat die nog een peer jaor duren gaot. Onderstaonde foto he’k vandemiddag maekt. Et mooie reviertien de Boorne stroomt dwas deur Ooldeboorn. Veerderop, tussen Akkrum en et Preenses Margrietkenaal, veren we d’r wel es op.