Oolde troep in et waeter

Vandaege het tuunman Jaap de boel om huus opredded. Et zicht d’r now weer hatstikke mooi uut. Dat moet ok, want zaoterdag komt d’r vesite. Tussen de middag hewwe tegere broodeten en ik hadde poddestoelesoep veur de tuunman en mezels. Halverwege september zullen de tuunmannen et schut aachter et huus vervangen. Et oolde spul wodt allienig nog bi’j mekeer hullen deur de klimop. Vandemiddag he’k een verhael naor de Schrieversronte maild veur et oktobernommer van et tiedschrift De Ovend en ik hebbe een kollum naor de Liwwadder Kraante stuurd. Bi’j mien kraantekollums komt now in et vervolg een ni’je foto. Ik hebbe ok een toespraoke oefend die ‘k morgen in de naomiddag holen zal in Gersloot. Ik bin now krek weeromme van oonze wekelikse mark bi’j et mfc. Daor he’k sjem, bloemen en gebak kocht. Op dat laeste gao ‘k vanaovend nog te zette. Kode geel is hier trouwens niks wodden, mar in Vinkege regende et as de zee. Hier mar een peer spatters.

Hieronder nog twie foto’s die ‘k gister vanuut de boot maekt hebbe van oolde troep die al jaoren in et waeter ligt tussen Warstiens en Wartena. Oolde boteboel, roesterig en bladderig. Et is gien gezicht. Kan die bende niet es een keer opruumd wodden? Wie gaot over zoks?