Oolde Sjoerd

Ik hebbe vandaege een lekkere fietstocht van 42 kilemeter maekt. Et was heerlik fietsweer. In bin eerst naor Wolvege fietst en van daor naor et Lendepattien. Over dat mooie pattien bin ‘k naor de Driewegsluus fietst en doe naor Ooldemark. Daor he’k op et terras van Family een bakkien thee en een tosti had. Doe ‘k krek weer op ‘e fiets stappen zol, zollen Jan en Alie de Haan krek et terras op. Die kom ik geregeld op  terrassen tegen. We hebben even genoeglik praot. Binnenkot komt Jan zien ni’jste boek uut. Vervolgens bin ‘k over Blesdieke en De Blesse weer op huus an gaon. Mien moeder zee vroeger: sjut van De Blesse. Een sjut is een onneuzel vrommesien. Ik wete wel zeker dat die niet allienig op ‘e Blesse veurkommen!

Misschien bin d’r wel whiskyliefhebbers onder mien dagboeklezers. Die drinken dan lichtkaans dat bekende spul: Jack Daniel’s uut Amerike of Johnnie Walker en William Lawson’s uut Schotlaand. Wat van veer komt zal et beste wel wezen. Now vergeet et mar. Hebben jim de Stellingwarver whisky Oolde Sjoerd wel es dronken? Et zal wel niet. Vergeleken mit Oolde Sjoerd is die butenlaanse troep gewoon slootswaeter. Slimme bekend is disse whisky misschien nog niet, mar disse reklame zag ik gister an et fietspad vlakbi’j de Scheenesluus. De meensken die disse godedraank maeken moe’n nog wel even weten dat ze oolde in plak van olde schrieven moeten. En waoromme schrieven ze van whiskey in plak van whisky? Ze zullen toch niet een slokkien te vule op had hebben doe ze et etiket maekten?