Onze avonden

In et weekaende he’k twie kollums in klad schreven en die heb ik vandaege uuttikt, befiekt en verbeterd. Iene gaot over mien moeder. Et is in juli dattig jaor leden dat ze uut de tied raekte. De aandere gaot over Gert en Hermien. Nee, niet dat populaire Twentse zangduo van eertieds. Gert en Hermien bin twie cavia’s.

Ik hebbe de roman Onze avonden van Alan Hollinghurst lezen. Ik moet vanzels Sir Alan Hollinghurst schrieven. Hi’j is vleden jaor ridderd deur keuning Charles. Et boek gaot over Dave Win. Et begint as die dattien jaor is en in grote brokstokken gaon we zien leven deur tot zien dood. De moeder van Dave, Avril, is Engels en kleermaeker. Zien vader is een Birmees. Dave is dus een betien donker en het een Aziatisch uterlik. Van zien vader wo’n we praktisch niks geweer. Dave woont bi’j zien moeder. Et is zeker een moeder-zeune roman. Laeter wonen ze mit Esme d’r bi’j. Een vrundinne en zaekepartner van zien moeder. Esme is lesbisch en zien moeder en Esme slaopen in iene kaemer. As Dave dattien jaor is gaot hi’j uutvanhuus bi’j de rieke femilie Hadlow. Mark en Cara Hadlow bin filantropen. Op heur kosten mag Dave studeren. Hi’j komt in de kunde mit Giles, de zeune van Mark en Cara. Een aekelike vent die him pest en dudelik vulen lat dat hi’j mar een kleurling is. Butendat is Dave ok nog homo. Dave Win zal een bekende akteur wodden, Giles Hadlow een de hieltied machtiger en geveerliker politikus. Dave wodt verliefd op verschillende mannen en het een peer relaosies die uuteindelik op niks uutlopen. Totdat hi’j op laetere leeftied Richard tegenkomt. Onze avonden is Dave Win zien eigen vertelling van zien leven: schoelejonge en student, zien eerste liefdes, op toernee mit een experimentele theatergroep en een liefde op laetere leeftied. Et is een verhael over ras en klasse, theater en seksualiteit, liefde en geweld van ien van de grootste schrievers van oonze tied. Een machtig mooi boek!