Ontruming Stedelik Museum

Vandemorgen om half 11 kwam Harry uut Noordwoolde bi’j me en ik bin bi’j him in de auto stapt. Vervolgens biwwe naor de mooie stad Alkmaar reden. Daor wawwe van doel en bekiek in et Stedelik Museum de tentoonstelling De Kremer Collectie. De Nederlaanse femilie Kremer verzaemelt sund 1994 oolde Nederlaanse en Vlaamse meesters. Ze hebben d’r intied al meer as 100 kocht en 50 d’r van bin in Alkmaar te zien. Hoe ontzaggelik riek moej’ wel niet wezen aj’ Rembrandt, Ferdinand Bol, Frans Hals, Gerard Dou, Pieter de Hooch en een hieleboel aanderen kopen kunnen… En ze kopen rustig deur. Eerst hewwe trouwens wat drinken op et terras van et museum had mit lekker gebak d’r bi’j. Ik hadde viegegebak. Heerlik! En doe begonnen we de schilderi’jen te bekieken. We hadden d’r nog mar een stokmennig zien en doe kwam d’r een man die tegen alle volk zee dat ze et museum ogenblikkelik uutgaon mossen. De boel mos sebiet ontruumd wodden omdat de beveiliging niet meer warkte. Een protte meensken hadden d’r uren en uren veur reisd om dit moois zien te kunnen. We hebben eerst nog wat waacht, mar kregen doe de bosschop dat et de hiele dag veerder wel duren kon. We bin Alkmaar doe mar in gaon. We hebben in de prachtige Grote of Sunt Laurenskarke west. Zo mooi! En van buten hewwe de prachtige Waag en et Hof van Sonoy bekeken. We hebben ok nog wat drinken had bi’j de rondveertboten. Vervolgens biwwe nog es naor et museum gaon. En… we konnen d’r weer in. We hebben de rest van de schilderi’jen bekeken. Wat een schitterende kollektie. Ontzettend mooi! Et mooiste was wel haost een schilderi’je van Pieter de Hooch. Een man in et schaad lest een brief veur an een vrouw die in et locht zit. Ie kun de fantesie dan volop warken laoten. Van wie is die  brief? Van femilie van veer vot? Of is et een liefdesbrief van de man zels die hi’j heur veurlest. Prachtig! Op ‘e boververdieping hewwe de schilderi’jen van de Bergense Schoele nog bekeken. Ok mooi! Mar ik kan jim allemaole anraoden om oonze oolde meesters daor bekieken te gaon. Et kan de hiele maond meie nog. Op ‘e weerommereize hewwe lekker waarm eten had in De Cuyper an de Dracht in Et Vene. Hieronder nog twie foto ’s die ‘k maekt hebbe. Boven: de prachtige Waag. Onder: in de veerte staot de Sunt Laurenskarke.