Ontlochten

Vandemorgen was d’r een man van Energie Service Frieslaand veur de kontrole van de cv-ketel. Doe hi’j daor klaor mit was, zee hi’j da’k de boel ontlochten mos. Ketel en radiators. Hi’j hadde zels niet zoe’n sleuteltien bi’j him, aanders hadde hi’j et wel even daon. Ik hebbe niet zoe’n sleuteltien en zol in de veerste veerte niet weten hoe zoks moet. Weer een perbleem. Wie kan ‘k en moe’k daor now toch weer veur vraogen? Al die technische dingen, ik hebbe d’r waorlik gien benul van. Een schoffien leden zee iene tegen me uut de grond van zien hatte: ‘Ie kun ok niks!’ Dat kwam wel even an, mar hi’j hadde wel geliek. Et is meer as droevig, mar ik kan haost niks.

Omda’k mar wat allienig in huus zitte en veerder gien meens zie, he’k de twaelf wat langere verhaelen die ‘k de laeste twie jaor schreven hebbe nog es in alle rust deurlezen. Hier en daor he’k een punt en een komma veraanderd. Soms een extra zinnegien toevoegd. Ik vien et aenlik best nog hiele mooie verhaelen en et verhael Parredies over mien oolde huus ontroerde me zuver. Dat he’k toch werachtig wel mooi beschreven. Hoe pienlik et in wezen ok is.