Onno en Hans Blom

Vandemorgen hebben een tuunman en een tuunvrouw et om huus henne weer hatstikke netties maekt en Anke het de boel in huus opredded. Ik dee zels nog wel es wat kerweigies in en om huus, mar omda’k niet meer op ‘e kni’jen liggen kan, wo’n die kerweigies deur Anke en de tuunmannen overneumen. An et aende van de morgen he’k een inleidingsgesprek had bi’j FysioSport an de Industrieweg in Wolvege. Zowat de buren van Jarmo… Daor het de dokter me dus hennestuurd. Ze daenken daor dat et slimme neudig is dat de dokter dat daon het. Onder begeleiding za ‘k daor oefenings doen moeten.

Vandemiddag he’k weer naor Wolvege west. In et kader van 80 jaor bevri’jding he’k vleden weke een lezing bi’jwoond van Niek van der Oord in de raodszael van et gemientehuus over jodevervolging en jodekampen in de Stellingwarven en omstreken. Vandemiddag was d’r in de biebeltheek een lezing van schriever/journalist Onno Blom en zien vader, de historikus Hans Blom. Onno Blom het et boek Oorlogsduif schreven. Een verburgen geschiedenis die zien femilie verscheurde. Grootvader Jan Blom zat in et verzet en overgrootvader Johan Blom en zien vrouw en zeuven kiender zatten bi’j de NSB. Dat hej’ wel wat te bepraoten en dat deden Onno en Hans dan ok. Et weren vurige en enthousiaste vertelders.