Onderscheidings

Zundagsaovens is d’r veur mi’j een protte moois op ‘e tillevisie te zien. Ik vien Project Rembrandt een mooi pergramme. Wat kun pattie meensken toch mooi tekenen en schilderen. Ik kan daor niks van. Ik tekene as een kiend van viere. Ik geniete de laeste weken ok slim van de dramaserie De Joodse Raad. Wat is dat een goeie Nederlaanse serie! Wat een mooi spel, mar wat een gruwelik onderwarp. Goed om naor te kieken, want et antisemitisme stikt overal de kop weer op. Een veurbeeld was dat geraos tiedens de eupening van et Holocaust Museum in Amsterdam. Et was een meer as schaandelike en onbeschofte vertoning.

Vandemiddag he’k weer een tippe in de ni’je auto reden. Ik hebbe de radio en de navigaosie uuttest. Ik daenke da’k dat ok snappe. Ien keer zo’k nog schaekelen, mar dat hoeft nao 46 jaor niet meer. Et is aanders wel wat om een oolde hond et blaffen te leren. Ik hebbe ok al mien priezen en onderscheidings in een peer tassen stopt. Morgenvroeg wor ik in oons mfc De Ni’je Stienze verwaacht. Daor komt zo now en dan een koppeltien meensken bi’j mekeer. Meerst alliendstaonden. Ze vreugen as ik over mien priezen en onderscheidings wat vertellen wil. Mar ja, wat moe’k daor allemaole over zeggen? Et bin d’r hiel wat. Ik hebbe mar wat trefwoorden op een stok pepier schreven. Misschien willen ze me ok wel wat vraogen. Mar alle oorkonden, foto’s, eretekens en een skulptuur neem ik mit, dan kun ze dat spul ok bekieken.