Onder dienst

Omdat et vandaege een roezige dag wodden zol, he’k gistermiddag alvast een panne mit stamppot wottels/siepels toemaekt. Butendat he’k doe ok nog een kruudkoeke bakt. Zonder botter en eier, mar mit soepe, hunning en sjerp. Heerlik! Vandaege het Anke et huus schonemaekt en Jaap, de tuunman, het d’r veur de eerste keer van dit jaor west. De tuun leit d’r now weer netties bi’j. Hi’j het de toverhaezelneute rooid, die was dood gaon. Daor komt een aandere polle veur in de plak. Hi’j was allienig en hadde lange wark, dat hi’j het hier tussen de middag zien brood opeten. Ik hadde veur champignonssoep zorgd.

Et is vandaege percies zestig jaor leden da’k onder dienst gong. Ik kan me alles nog sekuur herinneren. Et in de trein stappen in Wolvege, et uut de trein stappen in Amersfoort. Doe weren d’r nog militaire treinen. De route naor de Juliana van Stolbergkezerne in Amersfoort was angeven. Daor et anmelden in een grote tente en doe naor de soldaotekaemer mit een hoge kolekachel. We sleupen op strozakken. Naor de eetzael gaon en uutschullen wodden veur filler deur de ooldere soldaoten. Ien van de eerste dingen die gebeuren mos, was et in de blanco zetten van een pat van de psu: koppel, pukkel, riemen… Daor is indertied een foto van maekt.