Johan Veenstra
Stellingwarver schriever en verteller

Omroep Frieslaand

Plaetst op 15 april 2022.

Vlak veurda’k gistermiddag vot zol en in mien verstruperspakkien butendeure ommestapte, zag ik een auto van Omrop Frysl├ón de weg daelekommen en die stopte bi’j me. Aachter et stuur zat kameraman Dirk Hofstede en die hadde een kollega bi’j him. We hebben genoeglik even praot. Et wonderlike was dat ze onderweg weren naor mien oolde huus. Een jonge die daor now woont het een oorlogsmuseum in een bi’jgebouw. Stom da’k vergeten hebbe te vraogen wanneer as dat op ‘e tillevisie komt. Dirk het as kameraman ok wel bi’j mi’j in huus west te filmen doe de dokumentaire Naozoemerlaand over me maekt wodde. Die is indertied op 7 meert 2004 op ‘e tillevisie west. Wat is dat al weer lange leden… Regisseur, kameraman en geluudsman bin op 7 feberwaori 2004 ok mit me mit west in de trein naor Amersfoort om een optreden van mi’j te filmen. Dat was veur de Fryske Krite van Amersfoort en de aovend was in Hooglaand. Dat weren nog es mooie tieden! De laeste keer dawwe mekeer troffen was een peer jaor leden in Harlingen. Ik leup daor neffens mi’j mit Jelle op ‘e straote doe we him daor tegenkwammen. Zoks is aorig!

Mien elektrische fiets is gister vier jaor oold wodden. Ik hole sekuur bi’j hoevule kilemeters a’k d’r jaors op fietse. De teller staot now nao vier jaor op 8404 kilemeter. Opsplist in jaoren: 2284, 1795, 2417 en 1908 kilemeter. D’r bin een protte meensken die vanzels vule meer fietsen as dat ik doe! Mar ik vien dit al mooi!