Omroep Frieslaand

Vandemorgen het Anke et huus schonemaekt zodat de vesite van vandemiddag in een netties huus kwam. Die vesite was René Koster die now as zzp-er nog in dienst is bi’j Omroep Frieslaand. Ik kenne René nog van de tied dat ik mien stiekelstokkies veur de radio vertelde. We kennen mekeer dus al hiel lange. René het me twie uren laank interviewd veur een radiopergramme mit bekende Friezen. En dus ok een bekende Stellingwarver… . Krek as vleden jaor kommen in de zoemertied interviews op ‘e radio mit bekende ooldere en wieze Friezen die over heur leven vertellen en de meensken lichtkaans wat verstaandige tips mitgeven kunnen. Ik bin daor vleden jaor ok al veur vraogd, mar doe vuulde ‘k me niet zo lekker. Mar now is et vandemiddag dus wel deurgaon. Et is een indringend gesprek wodden. We bin eerst naor mien oolde huus kuierd. Daor is ok een filmpien van me maekt dat op ‘e tillevisie te zien wezen zal en de meensken anvieteren moet om naor de radio te luusteren. Ik hebbe daor, op ‘e weg veur mien oolde huus, verteld over mien jeugd. Al kuierende d’r naor toe en weeromme naor huus hewwe drok praot en dat is allemaole opneumen. Weer thuus is et interview in de Weembos en in de tuun veerdergaon over mien wark bi’j de belastingdienst, mien radiopraoties, mien schrieveri’je. Over Een brogge van glas… Now ja, overal over.  Ik moch vier lieties uutzuken die bi’j mien leven passen en die dri’jd wodden zullen in et pergramme. Ik hebbe uutzocht: Het dorp van Wim Sonneveld, Thorbeckeplein van Robert Long, De taal van mijn hart van Stef Bos en Amanda Vrijdom en dan nog Danny Boy van Jim McCann. Aandere bekende Friezen die interviewd wodden bin o.a. schaetster en radiomaeker Sippy Tigchelaar, akteur Freark Smink en de vroegere Lawei-direkteur Roel Oostra die al 103 jaor oold is. De interviews wo’n uutzunnen in et radiopergramme Buro de Vries van 12 tot 1 ure. De kommende zundag is de eerste oflevering mit Sippy Tigchelaar. Ik wete nog niet wanneer as ik te heuren bin, mar dat wodt me nog deurgeven.

D’r kwam gister een kaorte van Jan en Diana die vandeweke in een hotel in Epe  zitten. Zollen ze ok zoe’n groot edelhat zien hebben?