Oldeholtpade in vroegere tijden

Ik was vandemiddag om even veur vier ure in De Rustende Jaeger in Hooltpae. Daor wodde et boek Oldeholtpade in vroegere tijden prissenteerd. Een boek van Anita Exterkate-Bos. Anita is een kleindochter van Tiemen de Jong en Annigje de Jong-Woudstra. Tiemen wodde ok wel Tiemen Schoe nuumd, want hi’j was de schoelapper op et west van et dörp. De verhaelen in et boek wo’n verteld deur inwoners van now. Et gaot om verhaelen van zoe’n zestig jaor leden. Et boek zicht d’r prachtig uut, het een had kaft en telt 205 bladzieden. D’r staon een protte foto’s in. De middag wodde prissenteerd deur Freddie de Vries. D’r was ok meziek en d’r wodde mitzongen. D’r wodde naemelik een Stellingwarver potpourri brocht deur Henk Oostra en de Autino’s. Dat bin Aukje Steeman en Tini de Lange. De potpourri beston uut Waor de Lende, Ode an de kroje en et Stellingwarfs Volkslied. D’r wodde dus drok mitzongen deur de meensken. De grote zael van De Rustende Jaeger zat stampvol. Anita hadde een protte vlocht op ‘e kooi. Et is mooi dat oolde dörpsverhaelen vaastelegd wodden. Een veurbeeld veur aandere dörpen!