Ofzeggen

Ik blieve an et ofzeggen… Vandemorgen hadde Jarina op vesite kommen zuld en vandemiddag ha’k mit Frits lunchen zuld in Museum Belvédère in Oranjewoold. We hadden vanzels ok een tentoonstelling bekieken en uutvoerig bi’jpraoten zuld. Mar ja, iene die nog niet zolange leden een zwaore opperaosie ondergaon het, moet al hielemaole niet bi’j me in de buurt kommen. Ik moet him zeker niet besmetten. Gistermiddag hadden Jan en Riny hier kommen zuld, dat is ok niet deurgaon. Ik hadde Riny heur autobiografische boek besteld over heur leven as barvrouw in Amsterdam daor ze preens Willem-Alexander op een keer onverwaachs over de heerd kreeg. Henk van der Veer het heur wat dat anbelangt krek interviewd veur de Friesland Post. Ik hebbe gistermorgen nog wel even naor de waarme bakker en de kezeboerderi’je west om twie kastpakketten. Anke en Else kriegen elk jaor iene van me veur bewezen diensten. Ik hebbe ze in de gauwighied an de deure ofgeven en bin doe gauw weer naor huus gaon. Ik blieve mar in de waarmte, dat liekt me et beste. Ik komme allienig hiel even buten om de voegelties wat te geven.