Ofscheidsvesite in Noordwoolde

Et was vandaege heerlik fietsweer mit een temperetuur van 23 graoden. Ik bin over De Hoeve en Steggerde naor de Heerlikhied De Eese fietst en doe over Eesvene, Ni’jesliek en Frederiksoord naor Wilhelminaoord. Daor he’k op et terras van Family een koppien drinken en een twaelfuurtien had. In Noordwoolde-Zuud steuven me vier hadfietsers veurbi’j, allegeer in een liekes fietspak. Gruun en zwat a’k et me goed herinnere en… onder op ‘e rogge een West-Stellingwarver vlaggien. Dat is toch aorig! Op vekaansiepark Et Bosmeer bin ‘k veur de laeste keer op vesite west bi’j Harry en Frans. Nao acht jaor Noordwoolde gaon ze now weer in heur huus in Den Burg op Texel wonen. Morgen hier meer over in dit alles onthullende dagboek.

Hieronder twie foto’s. Boven: ik hebbe vandemiddag tussen Eesvene en Ni’jesliek een foto maekt van disse Saksisch andoende boerderi’je mit een mooie levensboom in de rute boven de veurdeure. Onder: Harry van De Lemmer is op et ogenblik vier daegen in een femilie-vekaansiehuus in Beekbargen. Hi’j maekt daor mooie fietstochies en stuurde me tal van foto’s toe. Op disse foto de Rijn bi’j Millingen. Et waeter staot zeker twie meter leger as wat aenlik moeten zol.