Ofscheid burgemeester André van de Nadort

Vandemorgen bin ‘k op ‘e fiets naor kapster Bertha in Et Vene west. Henne bin ‘k bi’j de Kuunder langesfietst en weeromme deur de bossen van Oranjewoold. Ik zie d’r now netties uut veur de bi’jienkomst van vanaovend. Ik hebbe bi’j Bertha een koppien ossestatsoep en een uutsmieter had.

Doe ‘k weer thuus was he’k een ovendschaole mit eerpels/zoerkool klaormaekt veur de meensken van de JVS die hier vri’jdag nao de vergeerdering blieven te eten. Dat is hielemaole misgaon omda’k et vusen te drok hadde. De zoerkool is me verbraand. Ik mos gauw digitaal toestuurde vergeerderstokken van de JVS naokieken en d’r was ellende omdat de kraante now niet meer bezorgd wodt omdat de straote d’r uutligt. Mit hulpe van buurvrouw Jannie kan ‘k de kraante now in ieder geval digitaal lezen. Deur alle drokte gong de kokeri’je dus hielendal mis. Gelokkig ha’k nog een pak zoerkool in huus, dat he’k dus opni’j daon. Mar doe stonnen de kookte eerpels al een poze. Et is wat een vieze griemeri’je wodden, mar et moet zo mar. Meer tied he’k niet. Morgen bin ‘k de hiele dag vot en vri’jdagmorgen ok.

Vanaovend nemt burgemeester André van de Nadort ofscheid in et gemientehuus van Wolvege. De gemiente het mi’j vraogd om een gedicht veur him te schrieven. Et is een hiel persoonlik en wat mankeliek gedicht wodden, want ik vien et slimme spietig dat de burgemeester hier in wezen weghaeld is. Et gedicht hiet Reiziger. Ik zal et vanaovend veurlezen mit een inleidend praotien d’r bi’j. De aovend wodt eupend mit een toespraoke van Arno Brok, de Kommesaores van de Keuning in Frieslaand. Ik zal aanst nog es goed oefenen.

Hieronder dan nog een foto die ‘k vandemorgen maekt hebbe doe ‘k onderwegens naor Et Vene was. Boties bi’j de Mildamster Brogge.