Oekraïne

Vandemorgen ston de haene al weer kri’jende op ‘e oprit. D’r lag gien voegelvoer meer. Dat he’k d’r dus sebiet hennestri’jd en doe is hi’j votdaolik begonnen te pikken. Waor zol dat dier naachs toch wezen? En as et now vriezen gaot? Want dat gaot et, zeggen de geleerden. We zullen et zien.

Nog even over die prachtige aktie veur Oekraïne van de drie kraanten van Mediahuus Noord. An et aende van vleden jaor gavven de lezers van Liwwadder Kraante, Friesch Dagblad en et Dagblad van et Noorden mit mekeer veur 392.550 euro veur Oekraïne. Dat was al geweldig, mar now gavven ze an et aende van et jaor 638.386 euro. Dat is vanzels hielemaole geweldig. Alles wodt goed besteded en van alles wodt d’r hennebrocht en daor wodt in de kraanten verslag van daon. We moe’n goed beseffen dat de Oekraïnse soldaoten daor ok veur oonze vri’jhied vechten en…doodgaon. Dat wi’j nog altied in een demekraotische rechtsstaot leven is een groot goed. As die misdaodiger in et Kremlin et van Oekraïne wint, is daornao een aander laand an de beurt. Die man hoolt niet zomar weer op, die het een missie. Ruslaand weer groot maeken. Dat is veur oons allemaole een hiele geveerlike missie. Oekraïne het oonze steun meer as neudig en moet die van ’t jaor op alle gebied ok weer rejaol kriegen.