Oefenen

Mit paos- en pinksterdaegen praot ik meerstal nooit mit iene. Ik hebbe een verhael opstuurd veur et juni-nommer van et Stellingwarver tiedschrift De Ovend. De titel is Bureplicht en daor gaot et ok over. Ik hebbe ok wat mos en ontuug tussen de stienen wegkrabbed. Et was mooi weer veur zok ellendig wark. Mar ja, zoks kan ‘k nao woensdag weer een peer weken niet doen. Wat za’k bliede wezen as al dat gedoe mit de ogen aachter de rogge is. Mar dan zal d’r wel weer aander gedoe wezen. Ik hebbe vandaege oefend en 57 kilemeter mit de ni’je auto reden. Ok een tippien over de snelweg. Dat gong allemaole best wel goed. Et vervelende is et in en uut de gerage rieden. Dan piept et allemaole zo en vuult et krek a’k zomar argens tegenop botsen zal. Dat is trouwens nog niet gebeurd. Hieronder dan nog mar een foto van gister die maekt is deur leermeester Jarmo. Hier onthulle ik de ni’je auto.