Norg

Et was gisteraovend vreselik mal weer doe ‘k naor Norg ree. Regen en wiend. En dan al die autolochten op et natte asfalt. Dat was niet plezierig rieden. Bi’j Makkinge was een ongelok gebeurd, we mossen van de grote weg naor de parrellelweg. Mar ik bin veilig bi’j de Historische Verieninge in de Brinkhof kommen. D’r weren zoe’n zestig meensken om naor me te luusteren. En daor was de moeder van mien uutgever Abel ok bi’j. Aorig en kom mit heur in de kunde! Et was heur ni’jjaorsbi’jienkomst, dus weren d’r rollegies en glassies boerejongen. Dat heurt zo in Drenthe. Ik was eerder bi’j heur west te vertellen op 27 meert 2002 en op 12 jannewaori 2012. Op ‘e kop of elf jaor leden. Ik hadde vleden jaor al naor heur toe zuld, mar corona stak d’r doe een stokkien veur. Over tien jaor za’k d’r dus weer henne. Et vertellen gong goed. Nao et vertellen vreug een man mi’j a’k ok kiender en kleinkiender hebbe. Now, nog niet. Mar wat niet is kan kommen. Een vrouw vreug me as ik een schoffien leden soms in et radiopergramme Adres Onbekend te heuren was. Ja, dat klopt! Nog een vrouw vertelde me dat ze in Westervelde woonde en dat Betty Bakker altied zo wies mit me was. Wat aorig om te heuren! Betty was trouwd mit Martinus Bakker en zi’j woonden ok in Westervelde. Martinus Bakker was hiel bekend as Jouk, de Stellingwarver schriever en dichter. Op 10 november 1972 kwam in oons huus in Ni’jhooltpae zien boek Een haandvol speulgoed uut. Onderstaonde foto wodde daor doe maekt deur J. D. de Jong. Dat was in november dus al vuuftig jaor leden. Jouk en zien vrouw Betty staon fleurig op disse foto uut mien archief. Ik kreeg in Norg een flesse Nörger Spraokwaoter mit naor huus toe en doe was et weer gelokkig een hiel stok opknapt.