Noord-Veluws Museum

Ik bin vandemorgen in Wolvege in de trein stapt en naor Nunspeet gaon. Onderweg mo’k overstappen in Stienwiek en Zwolle. In Stienwiek leupen nogal wat Chinezen op et perron. Pattie nog mit mondkappies veur. Die weren grif onderwegens naor Gieteren. D’r was een Chinees vrouwgien dat allienig een jurk an hadde. Now, zo waarm was et niet. Zokken bin niet wies of ze hebben slim hiet bloed. In Nunspeet he’k eerst wat eten en drinken had in resteraant ’t Eiland tegenover et stesjon. En doe bin ‘k naor et Noord-Veluws Museum kuierd. Ik was daor een jaor of tiene leden ok west. Doe wa’k me an ’t veurbereiden op et schrieven van de roman Et geheim van de wiend. Ik bin doe in Nunspeet van alles geweerwodden over iekschelders. In die roman komt Jan Bouw ommes veur, een iekschelder uut Nunspeet. Een slim mooie mar ok slim verkeerde kerel. Et is in Blesdieke slecht mit him oflopen… Et museum was doe een soortement ooldhiedkaemer. Mar ze hebben d’r een prachtig ni’j museum naost bouwd. Nunspeet was in vroeger daegen een keunstenersdörp. Krek as Worpswede in Duutslaand en Laren en Bergen in Nederlaand. Tal van schilders gongen naor die dörpen en daor schilderden ze de netuur en de meensken en die heur wark. De permenente tentoonstelling getuugt daor van. Prachtige schilderi’jen over et oolde leven in Nunspeet en omstreken. Elke romantikus vint dit mooi! Schitterend. Al lieke schitterend was de tentoonstelling Frans Huysmans en de Bergense School. Frans Huysmans (1885-1954) heurde bi’j de Bergense Schoele, mar verhuusde in 1936 naor Nunspeet. Op disse tentoonstelling bin schilderi’jen van Huysmans en zien schilderskammeraoden uut Bergen te zien. Prachtige schilderi’jen van Bergen, Schoorl en Groet en de meensken die daor woonden en heur wark deden. Ik hebbe perbeerd ien van de schilderi’jen op petret te zetten. Et is een fragment wodden van Boerendans van Frans Huysmans uut 1914. Et hiet ok wel Danszaal of Feest in de Rustende Jager. We hebben trouwens in Hooltpae ok een Rustende Jager. En ik… gao zundag over een weke naor Bergen (an Zee) om mien gedichten veur te lezen. Zo is de cirkel weer rond. Nao et bekieken van de tentoonstellings he’k in et museumresteraant een koppien drinken mit een schoemgebakkien had. Ie moe’n toch wat van et leven zien te maeken…