Nog even volop zoemer

Vandemorgen wa’k om kwat over negen al in de Kiekenhof in Ni’jehoorn veur et bloedprikken. Mar es zien as d’r wat uutkomt. Ik hebbe trouwens beheurlik spierpiene. Et wil mar niet echt overgaon. Ik moet vanzels wel in beweging blieven en fietsen wil wel. Ik hebbe vandaege 51 kilemeter fietst. Wat een dag! Dat was trouwens de titel van et lietien dat Greetje Kauffeld in 1961 veur Nederlaand op et Eurovisie Songfestival zong. Ze kreeg zes punten. Mar inderdaod: wat een dag was et vandaege. De temperetuur leup op naor 27 graoden. Ik hebbe mien favoriete tocht fietst. Bi’j de Lende langes naor de Driewegsluus en doe over de Scheenesluus. Tussen de Scheenesluus en de Ooldelaemster Brogge kronkelde een haezelworm veur me over et fietspad. Bi’j de Ooldelaemster Brogge hadden ze boel op maendag los. Zodoende he’k daor een bakkien drinken en een brotien hamburger had. Et was d’r drok mit boten. Deur de Braandemeer bin ‘k naor Wolvege gaon om wat bosschoppen te doen en doe wa’k om ongeveer half drieje weer thuus. Hieronder een foto die ‘k vandaege maekt hebbe. Op 27 augustus maekte ik even veur de Sas een foto van een zwannefemilie. Op etzelde plak he’k now weer een foto maekt van ongetwiefeld dezelde femilie. De jongen netties tussen de oolden in. Een huusholing waor regel is. De meensken kun d’r nog wat van leren.