Nog een fietstocht

Ik hebbe vandaege weer op ‘e fiets vot west, mar een kleindere tocht maekt as gister. Mit mekeer 34 kilemeter. Ik bin bi’j de Kuunder langes naor Berkoop gaon. Daor he’k even bi’j mien uutgever an west en he’k een bakkien drinken en een jodekoeke had. Fettje en Hennie weren drok doende om et geld te tellen van de boekverkope tiedens Eupen Stal. Geld tellen is mooi wark! Vervolgens bin ‘k over Bekhof, Buil en De Oosterstreek naor Noordwoolde fietst. Daor he’k bi’j snackbar Bliede een brotien kroket opmoffeld. Over De Hoeve bin ‘k weer naor huus gaon. Et is opvalend dat d’r van ’t jaor allemachtig vule beien an de sepiepen zitten. De toeken hangen d’r zwaor van naor beneden. Vroeger hawwe zegd dat d’r vermoedelik een strenge winter kommen zol, mar dat gaot mit de klimaotveraandering niet meer op. Hieronder een foto die ‘k vandemorgen maekt hebbe. Dit is de Kuunder mit et fietspad d’r naost aachter Berkoop. In de veerte zocht een koppel koenen et schaad van een peer bomen op.