Nog een betien jaorig

Ik hebbe vandaege verhaelen rippeteerd veur et optreden van morgenmiddag. Et kost hiel staorigan ietsien meer muuite om et allemaole goed in mien hassens op te slaon. En ik bin nog altied een betien jaorig, want d’r kommen nog altied kaorten. Ik hebbe nog nooit zovule reakties op een verjaordag had: kaorten, tillefoonties, appies, mailties en een inzunnen stok in de kraante. En vandaege, een weke nao mien verjaordag, nog vuuf kaorten. Dat zal wel deur et winterweer kommen. D’r zal hier en daor wel wat post ophoopt wezen. Laot ik die vufe dan es mit ere numen. Peter Kooij stuurde me vanuut Zutphen een grafiekblad van himzels mit de fielsetaosies. Opgang/ondergang boven zee. Dick en Bonnie fielseteerden me vanuut Drachten. Dat bin dagboekelezers. Bonnie het van mi’j digitaal et keunsien leerd hoe aj’ ammarillen overholen en weer in de bluui kriegen moeten. Saskia uut Wolvege  schrift in et Stellingwarfs: 8 decennia vol herinneringen, verhaelen en wieshied. Bi’j dat laeste woord twiefel ik in hoge maote, mar toe dan mar. Vanuut Luxwoolde kwammen de fielsetaosies van Siebe en Tineke en Martin en Marijke. Tineke en Marijke warkten indertied op ‘e belastinginspektie in Et Vene. Ze hebben d’r wat moois van maekt. Een kaorte mit foto’s van mi’j veurop en een fielsetaosie in et Fries en Stellingwarfs: Fan herte lokwinske. Een felicitaosie van oons. En dan een kaorte mit de fielsetaosies van Arend uut Terwispel. Dat is een dagboekelezer. Hi’j schrift: Wêr’t ik op de wrâld ek bin, Johan Veenstra reizget mei. Bonaire, Suriname, Oekraïne, de Baltyske staten, de dei slùt ôf mei Johan. Ik daenke dat alle kaorten die ‘k veur disse biezundere verjaordag kregen hebbe mar in et archief van de Stellingwarver Schrieversronte moeten. Veur et ofwennen dan nog iene foto die zundag deur Elroy maekt is. Een mooie foto! Hoe hadde ik vroeger daenken kund da’k ooit nog es omke en ooldomke wodden zol!