Nobelpries

Ik kreeg vandemorgen inienend appies en mailties mit fielsetaosies veur de nommenaosie. Ik snapte d’r niks van. Zol d’r wat in de kraante staon hebben? De ellende is dat we hier sund woensdag al gien kraanten meer bezorgd kriegen in verbaand mit et winterweer. Moet dat zo mal? Dat ik hebbe de digitale versie van de Liwwadder Kraante bekeken. En ja, d’r ston een inzunnen stok over mi’j in. Een lezer van mien twiewekelikse kollums, Tjitte van Akker uut Liwwadden, fielseteert me mit mien 80^ste verjaordag en vint da’k de Nobelpries heure te kriegen. Een zin uut zien inzunnen stok: Hij verenigt literatuur, poëtisch woordgebruik en cultuur op een wijze die deze historische onderscheiding ten volle verdient. Ik bin et hier vanzels hielemaole mit iens. As et zoveer komt hoop ik dat d’r een chartervliegtuug vol fans mit kan vanof Eelde naor Stockholm. En dat ze dan mitmaeken kunnen dat ik de Nobelpries kriege van de Zweedse keuning Carl Gustav. En dan geef ik daornao weer een stamppotbuffet!

Ik bin vandemiddag naor kapster Bertha in Et Vene west. De grote wegen bin prima te berieden. Ik hebbe eerst een koppien thee had. Ik hadde stokkies oranjekoeke mitneumen. Vervolgens het Bertha me opkallefaterd veur de dag van morgen. Daornao he’k een koppien gruuntesoep en een uutsmieter had. En doe nog een koppien thee mit een kniepertien. Ik zie d’r now morgen hatstikke jong en enerverend uut. Alles bi’j oons mfc is in verbaand mit mien fesien van morgen deur vri’jwilligers ies- en  sni’jvri’j maekt. Morgenvroeg wodt d’r nog een keer mit zoolt stri’jd. Zie de foto hieronder. Ik bedaanke hierbi’j al die vri’jwilligers! Et is geweldig!