No komt it noch

Doe ‘k an et aende van de morgen tegen eterstied zalm an et bakken was, zag ik deur et keukenraem een iekhoorntien de weg over stoeven. Pal veur et raem roetste hi’j een boom in en even laeter sprong hi’j van takke op takke. As ik zoks kon, hoefde ik nooit naor fysiosport.

Ik bin vandemorgen mit fietstassen vol boeken naor de Schrieversronte in Berkoop west. Meerstal hael ik daor boeken op veur de verkope, mar now ruum ik zels wat boekeboel op. Een hiele flut boeken over de geschiedenis van Frieslaand, Et Bildt, Grunningen, Drenthe en Overiessel he’k daor ofleverd en die kommen daor in de haandbiebeltheek te staon en bin veur iederiene in te zien. Zo bin ze goed te plak en ik hebbe ruumte om ni’je boeken te kopen. Vandeweke komt et juni-nommer van et Stellingwarver tiedschrift  De Ovend bi’j de abonnees over de heerd, dat ik hebbe vandemiddag alvast een verhael mit foto’s uut mien archief naor Berkoop maild veur et augustus-nommer. Ik bin now ok wel klaor mit et gedicht da’k op verzuuk schreven hebbe. Nao de vekaansie van ankem weke stuur ik et op.

Een schoffien leden las ik It Swetshok, ferhalen fan in fjildman, van Gjalt de Groot. Now he’k van him No komt it noch lezen. Smoute ferhalen staot op et omslag. En dat bin et. Ik leze zien verhaelen mit groot genoegen. Verhaelen over biezundere meensken. Zoas de belevenissen van zien omke Durk die mar liefst zes Elfstedetochten ree. Mar ok de verhaelen over Ale de visker, de malle dood van Bouwe Hyltsje en de mollevanger Rienk Mol. De Groot vertelt ok over zien zeune Jan Dirk die mit zien partoer de PC van 2016 wun. Een mooi boek. Ik zal nog meer van him lezen gaon.