Johan Veenstra
Stellingwarver schriever en verteller

Ni’jehoorn

Plaetst op 15 meert 2022.

Ik zal vanaovend naor Ni’jehoorn te vertellen uut eigen wark. Dat is de wereld in ieder geval niet uut. In d√∂rpshuus De Kiekenhof ma’k vertellen veur de Vrouwen van Nu. Ik bin in et verleden twie keer eerder bi’j heur west, dat was in de jaoren 1991 en 1996. Dat is dus al een jaormennig leden. Ik hebbe de laeste daegen mien teksten flink ripperteerd, dat ik hope mar dat et vanaovend, an de aandere kaant van de Kuunder, goed gaon zal en da’k gien malle schoevers maeke.

In 2017 kwam mien laeste dichtbundel De overkaant van et waeter uut. Et eerste exemplaor he’k doe an de Drentse dichteresse Ria Westerhuis geven. Ik kenne Ria al jaoren en oonze wegen kruzen mekeer zo now en dan. Dat gebeurt op 26 meert weer. Dan komt Ria heur ni’je dichtbundel Dwaalstroom uut en… ik mag dan et eerste exemplaor van heur in ontvangst nemen. Ria is knapper as dat ik bin. Zi’j schrift heur bundels zowel in et Drents as in et Nederlaans. Ik kan et allienig mar in et Stellingwarfs. Ik hebbe gister alvast een toespraokien schreven, want ie heuren vanzels ok wat te zeggen aj’ een eerste exemplaor van iene kriegen. Dit fesien zal wezen bi’j Poortman op ‘e Bloembarg in Veeningen. Dat is wel een hiel bekend adres veur mi’j. Ik hebbe daor verschillende keren mitdaon an Taol an Taofel.