Ni’je inkommelingen

Gister kree’k veur de eerste keer van mien leven een Valentijnskaorte. En dat nog op mien oolde dag… Mar wel mooi! Lieve oom Johan, we vinden je lief staot d’r in. En ik kriege een hiele dikke Valentijnsknuffel van Elroy, Deli, Miles en Mia. En ze willen graeg da’k heur ni’je huus in Arnhem een keer komme te bekieken. Dat wil ik graeg!

Vandemorgen he’k naor Rinsma op ‘e Gediek west om mien deur heur inkotte broek, die ‘k daor een weke leden kocht hebbe, op te haelen. Op et parkeerterrein vun ik twie munten van tien centen. Dan begint de dag goed! Vervolgens he’k bi’j de Schrieversronte an west om wat spul op te haelen veur de verkope. Vandemiddag he’k de kollum Kraslotten nog even goed bekeken en die doe naor de kraante maild. En ik bin mit een gedicht an de gang west. Ik wodde gister al weer vraogd om een gedicht te schrieven.

Vanaovend za’k naor et gemientehuus in Wolvege om een peer verhaelen te vertellen veur ni’je inkommelingen. Veur de coronatied gebeurde zoks lange en lange jaoren twie keer in et jaor. En doe was et op 30 jannewaori 2020 de laeste keer, want die aekelike corona kwam oons over et mad. En now beginnen ze d’r nao vuuf jaor weer mit en ik mag weer mitdoen. Naodat de burgemeester een praotien hullen het, vertel ik twie verhaelen. Dan kun de meensken drekt wennen an oons mooie Stellingwarfs. Vervolgens wo’n we in groepen opsplist en die groepen kun dan luusteren naor een verhael van een wethoolder en ze gaon et gemientehuus deur om de keunst te bekieken. Nao ofloop kommen we bi’j mekaander in de kantine veur lekkere happies en draankies. Zo was et vroeger temeensen en ik daenke dat et now wel weer zo gaon zal. Ik gao d’r aanst mit genoegen henne!