Ni’je fiets

Wat was alles vandemorgen prachtig wit. Een wonderwereld! En et sni’jde mar deur. As kiend vun ik dat altied al zo mooi en ik vien et now nog altied mooi. We bin vandaege, krek as vleden weke, dichte bi’j huus bleven. We hebben mien oolde fiets aachter op ‘e auto zet en bin naor de fietseman in Wolvege reden. Vleden weke hawwe daor een ni’je fiets veur me uutzocht, mar ze wollen de oolde vanzels eerst nog zien veurdat ze een bod doen zollen. Dat bod pakte goed uut, dat we hebben de boel drekt ofhaandeld. Ze hebben et spiegeltien van de oolde op ‘e ni’jen iene zet en ik hebbe d’r ni’je fietstassen bi’j kocht. Nog gien helm… Mar dat komt nog wel. De man het van alles uutlegd, mar ja… En doe hewwe de ni’je fiets aachter op ‘e auto zet en bin naor huus reden. Wat een gelok da’k een grote hal hebbe. Daor hewwe de fiets hennezet en doe mos ik oefenen… Ik wete percies wat d’r in 1066, 1296, 1492, 1500, 1584 en 1648 gebeurde. Mar hoe kom ik op ‘e ni’je fiets van Tour op Turbo? En hoe hael ik de akku d’r of, en hoe krieg ik et locht an? Al die knoppies… Dat bin aandere perblemen. Dat is technisch en zokke kost willen mien hassens mar kwaolik opnemen. De Gazelle Grenoble C7+ blift eerst in de hal staon en dan oefen ik elke dag. Mar wat bin ik bliede da’k alles niet allienig uut hoeve te vienen. We hebben in de loop van de middag lekker eten in resteraant ’t Koepelbos in Berkoop.