Ni’j onderkommen Schrieversronte

Vandemorgen he’k op ‘e fiets naor de Schrieversronte in Berkoop west mit weer een flut spul dat daor wel in et archief kan. Ik bin de boel hier thuus an ’t uutmesten en ik komme alderhaande spul tegen dat wel naor Berkoop kan. De kollums die ‘k veurlezen hebbe veur Omroep Frieslaand-radio in et pergramme It Wapen fan Fryslân van Eelke Lok. Dan hewwe et over de jaoren 1999-2001. Ik was dan altied live in de studio. Douwe (Kootstra) en ik wisselden mekeer indertied of. Ikke de iene weke, hi’j de aandere weke. Laeter dee de al wegraekte Mindert Wijnstra ok mit. En dan de korrespondeensie angaonde de Zulveren Anjer. En de legendaorische cd Die Forelle – De Lende van et duo Johan en Johan. Op et feest van mien 60ste verjaordag in Et Waopen in Berkoop zong ik et lied De Lende op ‘e wieze van Die Forelle van Franz Schubert. Kammeraod Johan Bijkerk begeleidde me op ‘e piano. De cd wodde op 9 november 2005 opneumen bi’j him thuus in Almelo. Alle meensken die op et feest weren kregen doe een cd mit. Ik hadde d’r nog drieje en iene d’r van zit now in et archief. Ik hebbe ok nog even in et ni’je onderkommen van de Stellingwarver Schrieversronte keken. Et grote witte gebouw daor Baank Bercoop indertied in zat. Dat gebouw wodde eupend op 8 meert 1996. Rients Gratama schreef een schets die in et Fries, Nederlaans en Stellingwarfs speuld wodde bi’j de eupening deur Rients Gratama, Carry Tefsen en Johan Veenstra. Ik vergete die dag nooit. Een dag laeter gong mien moeder naor et ziekenhuus en ze zol niet weer thuus kommen. Mar wat kriegen ze daor een ruumte. Wat een allemachtig grote kelder zit d’r onder dat gebouw. Daor verdrinkt oons archief zuver in. Mooi da’k dat vandemorgen even bekieken kon.

Een schoffien leden he’k et boek Opera in het Weiland van Kasper Jansen lezen. Et wodde uutgeven bi’j gelegenhied van et dattigjaorig bestaon van Opera Spange. Spange is et Verona van West-Stellingwarf. Et is een prachtig uutgeven boek mit een protte mooie foto’s d’r in.