Ni’j huus

Ik hebbe vandemiddag Jarmo zien ni’je huus bekeken. Hi’j kreeg een huurhuus toewezen. Een mooi huus daor hi’j mar best mit uut de voeten kan. Nao de bezichtiging hewwe eten in resteraant De Stoof an de oolde rieksweg. Ik hebbe een twaelfuurtien had. Hiel lekker! En doe biwwe naor mien huus toe gaon. Daor het hi’j de virusscan op ‘e komputer weer veur een jaor verlengd. Hi’j het in mien auto reden. De raemen van de auto los en dan de meziek, of wat daor veur deurgaon mos, keihad an. Et was mooi weer, dat d’r was nogal wat volk kuierende bi’j de weg. Die zullen heur now grif ofvraogen wie ik in hemelsnaeme bi’j me in de auto hadde.