Ni’j boek

Doe ‘k vandezoemer boeken ston te verkopen op keunstmannefestaosie Eupen Stal in Berkoop wodde me geregeld vraogd a’k al weer mit een ni’j boek an ’t schrieven was. Dat is dus niet et geval. Ik kan me niet echt veurstellen dat d’r nog ooit een ni’j boek van me komt. Et is te vule wark op disse leeftied. Ik moet niet allienig et boek schrieven, ik moet ok alle korrektierondes doen, en ik moet veur een diel et boek nog verkopen ok. Dat is gewoon niet meer te doen. Dat zollen de bekende Nederlaanse schrievers allemaole es doen moeten… Butendat is de verkope van mien boeken enorm inzakt. Ik hebbe lange zovule optredens niet meer daor a’k ze verkopen kan, d’r bin vusen te min vri’jwilligers bi’j de sutelaktie en boekhaandel Zwikstra bestaot niet meer. Gelokkig da’k de goeie tied mitmaekt hebbe. Ik schrieve netuurlik nog wel. Elke dag een dagboekstokkien, ien keer in de veertien daegen een kollum in de Liwwadder Kraante, elke keer een verhael in et Stellingwarver tiedschrift  De Ovend. Ik schrieve ok nog wel es een verhael zoas de verhaelen in mien laeste boek Naozoemerlaand. Ik bin krek mit een ni’j verhael uut aende zet. Daor vertel ik laeter wel es wat over.