Niet naor de opera

Vandemorgen he’k weer naor fysiosport in Wolvege west en neffens de komputer he’k een intensief pergramme ofwarkt, mar et was minder intensief as veur et ziekenhuus. Ik moet et staorigan weer opbouwen, mar ik bin bliede da’k d’r weer henne west hebbe. Et was de bedoeling dat aachternichte Ria uut Papendrecht hier vandaege uutvanhuus kommen zol en we hadden tegere naor de opera an de Scheene in Ni’jtriene zuld. Sund 2001 wodt daor een opera opvoerd en van ’t jaor is et de alderlaeste keer. Die laeste keer wodt Die Entführung aus den Serail uut 1782 van Wolfgang Amadeus Mozart opvoerd. Drekt naoda’k uut et ziekenhuus kwam he’k et al ofzegd en daor bin ‘k aenlik wel bliede van. Zo waarm is et vandaege niet en om dan in wat wienderig weer butendeure an de Scheene zitten te moeten… Liever niet, hoe mooi et daor ok is. Ria is now uutvanhuus bi’j aachternichte (en heur nichte) Elly, hier ok in Ni’jhooltpae. Ze komt morgenvroeg bi’j mi’j op vesite. Mooi dawwe mekeer dan toch nog even zien. Vanaovend kiek ik zoas elke aovend disse weke naor ien van mien favoriete misdaodseries Silent witness mit et forensische wark van Nikki Alexander. Al jaorenlaank een prachtige serie. Mar as Nikki een liek eupen begint te snieden en kwakken inhoold van een meenselik lichem op een weegschaole legt… dan doe ‘k de hanen even veur de ogen.