Niet meer naor marken

Vandemorgen he’k even op ‘e fiets naor Berkoop west om wat bi’j de Schrieversronte weg te haelen. Ik was zuver wat mu doe ‘k weer thuus was. Ik hebbe besleuten en gao niet meer naor marken toe om boeken te verkopen. Deur de jaoren henne he’k allemachtig vule boeken op marken verkocht. De Boekemark in Drachten an et aende van de Friese sutelaktie en de Berkoper Mark weren indertied duzend-gulden-marken. Daor verkocht ie zeker veur duzend gulden. Mit Fettje he’k jaoren naor de Boekemark van Drachten west. Wat een feest! In 2006 verkochten we daor veur meer as duzend euro. Ieder jaor ston ik ok mit wisselende meensken op Berkoper Mark. Veur mi’j stonnen Pieter Jonker en Lamkje Hof daor te verkopen. Mit Ypie he’k jaoren arg goed verkocht op ‘e Pompoenemark bi’j de kezeboerderi’je De Stelp in Berkoop. Die drie marken bestaon niet meer. Ik gong ok al jaoren allienig naor (hobby)marken in Mildam, Scharpenzeel en Beetsterzwaog. En vleden jaor veur de eerste keer naor Blesdieke en Rottum. Mooi wark, mar et wodt me te zwaor. Ik zal et missen. Et is krek a’k een stokkien leven vot doe. Ik hope wel dat aanderen dit van me overnemen. Et is van groot belang. Niet allienig om de opbrengst, mar et Stellingwarfs en de Stellingwarver schrieveri’je moe’n zichtber wezen en blieven.

In de tied da’k in et ziekenhuus lag, kwam d’r een kaorte van Jan, Diana, Raymond en Leon uut Vaals. Die vierden daor een midweke vekaansie in een vekaansiehuus in Hoog-Vaals.