Johan Veenstra
Stellingwarver schriever en verteller

Nienoord

Plaetst op 29 oktober 2024.

Et is gien boties- en fietsweer meer. Zodoende hewwe vandaege naor De Lieke west om daor et Nationaol Rietuugmuseum te bekieken bi’j de borg Nienoord. We bin niet op redens naor De Lieke west, we hebben dus gien Liekebloeme mitneumen naor huus. Eerst hewwe in de oolde borg waarme poeiermelk mit gebak had. Vervolgens biwwe mit twie vrouwluden en een gids deur de grote opslag van rietugen west. De man vertelde d’r mooi over. D’r weren alderhaande soorten rietugen: koetsen, calรจches, sjezen en gao zomar deur. D’r ston ok een koetse die van de laeste Duutse keizer west was. Vervolgens hewwe een rondleiding deur de borg had. Vroeger ston d’r een aandere borg, die d’r now staot is bouwd in 1884. De borgen bin bewoond west deur de aodellike femilies Van Ewsum, Von Inn- und Knyphausen en Van Panhuys. Nao de rondleiding hewwe et museum mit rietugen en de nuundergrot nog bekeken. We hebben vanaovend waarm eten had bi’j de Koepelbos in Berkoop. Hieronder een foto van de borg Nienoord die ‘k vandemiddag maekt hebbe. Et was een mooie dag!