Nida

Ieder jaor gao ik zeker een keer mit de trein naor et Noord-Veluws Museum in Nunspeet omdat ze daor altied zokke mooie tentoonstellings hebben. Ik hebbe in Nunspeet eerst in resteraant Eiland vol smaak een koppien tomatesoep en een tosti had. En doe he’k in et museum de wondermooie tentoonstelling Nida, kunstenaarsdorp in Litouwen bekeken. In de 19^de en begin 20ste ieuw trokken overal keunsteners naor et plattelaand om daor de netuur, de meensken en heur wark te schilderen. Et beroemdste plak is Barbizon in Frankriek. Worpswede bi’j Bremen in Duutslaand is ok hiel bekend. In Nederlaand trokken de schilders naor Bergen, Laren en Nunspeet. Mar in Litouwen was ok zoe’n bekende keunstenersklonie: Nida. Keunsteners van de keunstakedemie in Keuningsbargen trokken daor henne. Keuningsbargen was de heufdstad van et Duutse Oost-Prusen. Now is et de Russische enklave Kaliningrad. Et gaot hier om plein-air schilderkeunst. De schilders schilderden dus butendeure. D’r bin schilderi’jen te zien uut et impressionisme en et expressionisme uut de periode 1870-1945. Fantastisch mooi! Ik hebbe d’r ok een film over Nida bekeken. Een streek mit viskersdörpies en hoge dunen. Et dot daor zuver wat Italiaans an. Gao naor et museum te kieken! Mar dan moej’m vlogge wezen. De tentoonstelling is nog tot 7 december. Naoda’k alles bekeken hadde, he’k in et museum nog een koppien drinken had mit een klein gebakkien d’r bi’j. Hieronder twie schilderi’jen die op ‘e tentoonstelling te zien binnen. Boven: Hans Hentschke: Italiaans gezicht op Nida. Onder: Berthold Genzmer: Kurische Mädchen.