Nicolaas II

Ik hebbe vandaege een kollum in klad schreven. De uutwarking komt laeter wel. Ik hebbe ok nog wat tekst rippeteerd veur vanaovend, want ik zal naor Steggerde te vertellen. Daor doe ‘k morgen wel verslag van.

Sergei Brehhov het me mooi spul toestuurd vanuut Tallinn. Ik verzaemele al jaoren grafiek. Exlibris en kleingrafiek, zoas hooltgravures. Krek as mit postzegels is op et laeste et aende te zuke en moej’ je specialiseren. Ik bin doe overgaon op et verzaemelen van mythologie en poezen. En doe kwam corona vuuf jaor leden mit een zee van tied en bin ‘k uut aende zet mit royalty op grafiek. Dat verzaemelen mar weinig meensken. Zo krieg ik dus een kleine mar slim biezundere verzaemeling. Ik hebbe now 166 van die grafiekblaeden mit ofbeeldings van Napoleon, Frederik de Grote, Sisi, Cleopatra, Peter de Grote en nog een hieleboel aanderen. Zodoende kwam ik een jaormennig leden in kontakt mit Sergei in Letlaand. Die verzaemelt ok grafiek en snuuit daor veur mi’j as hi’j ok wat moois veur mi’j vienen kan. Dat zo heb ik al een hieleboel prachtige hooltgravures mit Russische tsaren d’r op van him toestuurd kregen. Gister kreeg ik weer negen mooie prenties van him. Now ja, ik betaele him d’r vanzels veur. Hieronder ien van de prenties. Dit is een ofbeelding van tsaar Nicolaas II die in 1918 mit zien vrouw en kiender deur de bolsjewieken zo gruwelik vermoord is. Et is in 1995 maekt deur de Russische grafikus Rudolf Kopylov.