Nedersaksische tillevisieserie

Et is an filmregisseur en -producent Johan Nijenhuis (Markelo, 1968) te daanken dat d’r nog wel es films en tillevisieseries maekt wodden daor Nedersaksisch (Twents/Sallaans) in praot wodt. Daenk mar an Van Jonge Leu en Oale Groond en De beentjes van Sint-Hildegard. En now kuwwe dus elke aovend kieken naor de tillevisieserie Woeste Grond. Ik kieke eins nooit naor Nederlaanse series, mar now dus even wel. Et gaot over de femilie Ottink die op boerderi’je De Weuste woont. Dinant en Vera boerken daor mit de oolden van Dinant. Dinant en Vera vreten allebeide onder ’t stek deur. Ze scharrelen/seksen dus mit iene aanders en daor komt vanzels gedonder van. Stel dat Vera scheiden wil… Moet de boel dan ok verpat wodden? Dinant wodt speuld deur muzikaant Hendrik Jan Bökkers (Olst, 1977). Hi’j was al bekend van zien rockband Bökkers die rock’n roll in et Nedersaksisch speult. In disse serie praoten de oolden et beste Sallaans, de generaosie d’r onder al wat minder en de jongeren Nederlaans mit eventueel nog es een woortien streektael. Zo lat de serie ok zien hoe as et d’r mit et Nedersaksisch veurstaot. Mar tillevisieseries, films en zeker rockbands in et Nedersaksisch bin hatstikke goed om de jongeren d’r veur te interesseren.