Nedersaksisch symposium

Doe de regen vandemiddag ophul bin ‘k op ‘e fiets stapt en naor Wolvege west om bosschoppen. Ik moet zien da’k et jaor deur fietsen blieve. D’r is trouwens nog een protte te vertellen over gister. Daor bin ‘k nog niet an toekommen en dat smeer ik over twie daegen uut. Vandaege en morgen.

Gistermiddag was d’r een Nedersaksisch symposium in Berkoop dat bi’jwoond wodde deur Raquel Garcia Hermida-van der Walle, lid van et Europese Parlement veur D66 en wethoolder Jelke Nijboer van Oost-Stellingwarf. Zi’j kregen een Rappot over et Nedersaksisch en et Limburgs anbeuden dat schreven is deur Henk Bloemhoff. Zien onderzuuk lat zien dat et mit de erkenning van beide taelen vusen te traoge gaot. Et symposium gong over de Nedersaksische literetuur van de laeste twintig jaor. Henk Nijkeuter vertelde over de Drentse literetuur, Abel Darwinkel over de Stellingwarver en Fieke Gosselaar over de Grunninger. Susanne Braamburg en Diana Abbink behaandelden de literetuur van Oost-Veluwe en de Aachterhoeke en Jacqueline Visscher hul een verhael over de literetuur in et Urkers. Dick Schlüter zol praoten over de literetuur in Twente, Sallaand en Noordwest Overiessel, mar hi’j kwam niet opdaegen. Hiel jammer vanzels. A’k et goed begrepen hebbe, praot 97% van de Urkers heur eigen tael nog. As dat zo is, staot die Nedersaksische tael d’r et alderbeste veur. Et was een biezunder aorige middag die deur een goeie veertig meensken bi’jwoond wodde.