Nedersaksisch Duo

Vandemiddag ha’k vesite hebben zuld van mien schrieverskammeraoden Ingmar (Roerdinkholder) en Chris (Canter). Ingmar komt van oorsprong van de Aachterhoek, is opgruuid in Drenthe, en schrift in et Drents. Chris woont in een veurstad van de Spaanse heufdstad Madrid. Hi’j is opgruuid in Ni’jlusen boven Zwolle, en schrift in de tael van Ni’jlusen. Hi’j is now een weekmennig bi’j zien oolden in Zwolle. Twie jaor leden hewwe mekeer daor troffen en een reisien naor Ni’jlusen maekt. Dat et Nedersaksische Trio zol vandemiddag in Ni’jhooltpae bi’j mekeer kommen. Mar… corona gooide weer es roet in et eten, dat Chris kwam allienig. Ik zol him van de trein haelen, mar doe hi’j me belde was hi’j lopende al een aende onderweg. We hebben hier eerst wat drinken had mit wat d’r bi’j en veural ok bi’jpraot. Vervolgens he’k him in Berkoop et gebouw van de Stellingwarver Schrieversronte zien laoten. Daor hewwe theedronken bi’j Pieter en Fettje. Et was vandaege Berkoper Mark. Ik hebbe gien boekekraom van de Schrieversronte zien… Altied het de Schrieversronte mit een kraom op Berkoper Mark staon. En now niet… Nao Berkoop hewwe een autotochien maekt. Over Blesdieke mit et kesteel, Ooldemark en Ossenziel. En doe over de Lendediek weeromme. Chris het hier vanaovend waarm eten had en doe he’k him naor de trein van half achte naor Zwolle brocht. Hieronder een foto van een blinders mooie middag. Ik hebbe Chris (in et midden) mit Pieter en Fettje op petret zet in Berkoop.