Johan Veenstra
Stellingwarver schriever en verteller

Naozoemerlaand

Plaetst op 19 december 2022.

Ik hebbe vandemorgen een peer uren overleg had mit mien omslagontwarper Sijtze Veldema van Stilet Vormgeving in Dwingel. Ik hebbe him verteld over mien ni’je boek daor 28 wat langere verhaelen in kommen. We hebben alle verhaelen even deurneumen. Sijtze zal veur de opmaek en et omslag zorgen gaon. Daor bin ‘k slimme bliede mit, want ik kenne gieniene die zoks beter kan. Ik zal binnenkot nog mit de flaptekst en de technische bladzieden an de gang en dan stuur ik him alles in jannewaori toe. Daornao begint d’r dan weer een grote korrektieronde. Et boek krigt as titel Naozoemerlaand. Die titel komt vaeker in mien wark veur. In et boek Longerlaand staot een gedicht van mi’j mit dezelde titel. Butendat hiette de dokementaire die Omroep Frieslaand indertied van me maekte ok zo. In dit ni’je boek staot ok een verhael mit die titel. Et gaot over een man en een vrouw die mit mekeer in de kunde kommen in de naozoemer van heur leven. En ja, ik zitte ok dikke in de naozoemer van mien (schrievers)leven. Ik hope niet dat dit mien alderlaeste boek is, mar Naozoemerlaand zal wel ien van mien laeste boeken wodden.