Johan Veenstra
Stellingwarver schriever en verteller

Naozoemerlaand

Plaetst op 15 juli 2023.

Mit goed honderd man pebliek is et gister een onvergetelike aovend wodden. Ik kreeg en kriege allienig mar slim positieve reakties en d’r bin een hiele protte boeken verkocht. Bi’j iederiene he’k d’r wat in schreven en ik hebbe ze vanzels signeerd. Ik zat trouwens vol spanning. Zoe’n eerste keer vertellen en veurlezen van ni’je verhaelen is spannend. As et mar goed gaot. A’k d’r mar niet in verbroeze. Mar ik hadde zo vaeke rippeteerd, dat et is goed gaon. Et moet allienig nog wat soepeler wodden. Grytsje Kingma zong prachtig en ze hadde speciaol twie lieties veur me schreven en het die zongen op ‘e wieze van O, Danny Boy en My Bonnie is over the Ocean. Wat toch vreselike aorig. Mar ik vule me op zoe’n mement wel wat ongemakkelik a’k zo in de belangstelling stao. Mit et vertellen stao ‘k ok in de belangstelling, mar dan he’k d’r gien last wel. Mar as d’r zo speciaol veur je zongen wodt… dan bin ik toch dat kleine verlegen joongien van vroeger weer een betien. Abel hadde et, mit beelden d’r bi’j, over de meziek en po√ęzie uut aandere taelen die ik in mien verhaelen verwarkt hebbe. Dat was een mooi onderdiel van et pergramme dat eupend wodde deur Klaas van Weperen. Nao ofloop hewwe mit een hiele groep volk nog lange naopraot en heb ik trakteerd op waarme happies. Ik was krek nao middernaacht thuus mit alderhaande kedo’s. Dat hoeft en moet aenlik niet, mar et is vanzels wel mooi. Bloemen, boeken, lekkers, een boekebon en wethoolder Jelke Nijboer gaf me een kedo van de gemiente Oost-Stellingwarf veur alles wa’k daon hebbe. Een prachtig en kleurig glasobjekt uut glasatelier Benedictus in Appelsche. Hiel in et klein is et waopen van Oost-Stellingwarf d’r in verwarkt. Hiel arg mooi! Lenus van der Broek het een serie foto’s maekt. Hieronder geef ik et eerste exemplaor van Naozoemerlaand an Frits van der Vinne van boekhaandel Zwikstra in Wolvege. As daank omdat hi’j deur de jaoren henne zovule Stellingwarver boeken veur oons verkocht het. Naozoemerlaand is now overal te koop!