Johan Veenstra
Stellingwarver schriever en verteller
Plaetst op 10 meie 2023.
Ik hebbe gister et laeste wark daon an mien ni’je boek Naozoemerlaand. Ik hebbe et omslag naokeken en angeven dat d’r nog drie dinkies veraanderd wodden mossen. Omslagontwarper Sijtze Veldema het de boel anpast. Dat now zit disse put wark d’r op en kan et boek drokt wodden. Et omslag zicht d’r prachtig uut en past geweldig goed bi’j de titel. De zee, et straand en een inklapte parresol. We zitten hier dikke in de naozoemer, et seizoen is veurbi’j, de toeristen bin vot, et straand is leeg. In zeker vuuf verhaelen in et boek kommen zee en straand veur. En hoe aj’t ok bekieken, ik zitte in de naozoemer van mien schrieversleven. Ik hope niet dat dit mien alderlaeste boek is, mar dat zol vanzels zomar kunnen. Dit wodt in ieder geval ien van mien laeste boeken. Ik hope dat een protte lezers van de 28 hiele biezundere en mooie verhaelen genieten zullen. Hieronder de veurkaant van et boek.