Naozoemerlaand

Ik hebbe vandemorgen overlegd mit Abel, de direkteur van de Stellingwarver Schrieversronte, angaonde mien ni’je boek: de verhaelebundel Naozoemerlaand. Et zal ien van mien laeste boeken wodden. Hopelik niet et alderlaeste… Ik hebbe alle korrektierondes now daon, Sijtze het de laeste verbeterings anbrocht en die heb ik weer naokeken. Now gaot Abel de boel nog een keer bekieken. He’k nog tikfouten zitten laoten? Et zal wel, mar ik hope dat hi’j niks vint. We hebben even overlegd over de aovend as et boek uutkomt. Dat zal wezen op vri’jdagaovend 14 juli in mfc De Ni’je Stienze in Ni’jhooltpae om acht ure. De meziek zal die aovend verzorgd wodden deur de Friese zangeresse Grytsje Kingma. Grytsje en ik verzorgen mit ienige riegelmaot een Fries/Stellingwarfs pergramma veur alderhaande groepen meensken. Et eerste exemplaor van et ni’je boek is veur Frits van der Vinne van boekhaandel Zwikstra in Wolvege. De oplaoge wodt 1.000 exemplaoren. Et boek komt uut in een had kaft mit een leeslint. De pries wodt 16,95 euro. Dat is een slieterspriesien veur zoe’n mooi uutgeven boek van 224 bladzieden. Vandemiddag he’k een artikeltien over et boek schreven veur et Stellingwarver tiedschrift De Ovend.