Johan Veenstra
Stellingwarver schriever en verteller

Naor Zwolle

Plaetst op 7 juni 2024.

Neffens de buierader zol et vandemiddag dreuge blieven, dat ik hebbe, veurda’k naor Zwolle zol, de witte waske butendeure an de liende hongen. Ik zat nog mar krek bi’j Wolvege op ‘e vierbaensdiek of et begon te regenen as de zee. Mar… doe ‘k zokrek thuuskwam hong de waske dreuge an de liende. Et hadde in Ni’jhooltpae niet regend, de buierader hadde dus wel geliek. In Zwolle he’k bi’j Antje op vesite west. Ze is tien jaor oolder as ik bin. As klein joongien kwam ik mit kammeraotien Wube de Vries bi’j heur oolden uutvanhuus in Blesdieke. Daorveur woonden ze in Ni’jhooltpae. Janne en Wander weren baos tenielspeulders en speulden mit mien ome Sent bi’j de Ni’jhooltpae├»nger tenielverieninge Nooit volmaakt. Wander (officieel: Warner) kwam van Ni’jhooltpae, Janne (Janna) kwam van De Kuunder. De moeder van mien moeder en Wander zien moeder raekten weg doe mien moeder en Wander nog mar 20 jaor weren. Mien moeder het me vaeke verteld dat ze mekeer op een keer troffen op ‘e Hoeke in Ni’jhooltpae en dat ze doe allebeide gien moeder meer hadden. Dat was verschrikkelik, zeker veur mien moeder. Want et bun heur an huus en zol heur leven veurgoed veraanderen. Hieronder een misschien wat donkere mar wel mooie foto van Warner van Veen as jongkerel.