Naor Velsen-Zuud

Ik bin vandaege naor Egbert en Rieke in Velsen-Zuud west. Et was een mooie dag. Goed dawwe weer es hielemaole bi’jpraoten konnen. Ik zag gisteraovend gelokkig dat de snelweg tussen De Jouwer en Sneek et hiele weekaende ofsleuten is. A’k dat niet weten hadde, wa’k mal te passe kommen. Mar ik bin dus extra vroeg votgaon en over Liwwadden en Harlingen naor de Ofsluutdiek gaon. Dat was vanzels wel een tippien omme, mar ik gao altied over de Ofsluutdiek naor heur toe. Bi’j Amsterdam langes durf ik niet. Daor vuul ik me niet zeker. Ik was vandemorgen om kwat veur elf bi’j heur. Vandemiddag biwwe naor resteraant Kop van de Haven in IJmuden west en daor hewwe heerlik eten had. Alle drieje kibbeling en petat. Echt superlekker! Et resteraant zat vol eters en ligt pal naost et Noordzeekenaal. De veerboot naor Newcastle lag klaor veur vertrek, de eerste autos’s en bussen reden et schip op. Om kwat veur vufe bin ‘k bi’j heur weer in de auto stapt en dezelde weg langes weer naor huus gaon. Ik was om goed zeuven ure weer thuus. Ik hebbe alles mit mekeer 350 kilemeter reden. Hieronder een foto die ‘k vandemiddag maekt hebbe. Gezicht vanuut et resteraant. Botien op et Noordzeekenaal mit an de aandere kaant van et kenaal Tata Steel, de vroegere Hoogovens.