Naor Twente

Ik bin vandemorgen om negen ure in de auto stapt en hebbe de hiele dag in et wondermooie Twente west. Ik bin op vesite west bi’j Gertie in Almelo. Now Johan d’r niet meer is, is zi’j allienig. Dan is et krek as is alle grond je onder de voeten wegsleugen. Johan zien vleugel staot nog in de kaemer. Zien hoed ligt d’r op en de bladmeziek staot klaor. Hi’j zol d’r zo op speulen kunnen, mar dat zal nooit meer gebeuren. Wat is et leven dan nog weerd? Het dat aenlik nog wel zin? We hebben lange mar weerdevolle gesprekken had over leven en dood. Laeter biwwe tegere in mien auto even et pad uut west. Over Tubbargen en Vasse biwwe naor Hoeve Springendal in Hezingen reden. Een laandgoed mit zoemerhusies en plak veur campers. In et smoeke resteraant hewwe eerst wat lekker eten had en doe hewwe van daor een kleine kuier deur et glooiende Twentse laand maekt. Zo mooi! Daornao biwwe weer naor Almelo gaon. Ik hebbe d’r nog een peer plakkies bolle had en bin om zes ure weer in de auto stapt om naor huus te gaon. Hieronder een foto. Spietig genoeg was de zunne d’r nog niet bi’j doe we in Hoeve Springendal weren. De zunne kwam laeter pas. Dat was jammer veur de foto. Hier een peer gebouwen die op et laandgoed staon. In et linkerhuus woont de baos van et spul: Walter Brunninkhuis oftewel Brunninkhoes in et Twents. We hebben even mit him praot. Hi’j in et mooiste Twents en wi’j in et mooiste Stellingwarfs!