Naor Sipke in Amersfoort

Vandaege bin ‘k mit Marjan, een aachternichien van me en de zuster van mien warkster Anke, naor Sipke Leemans in Amersfoort west. Sipke is een aachterneve van Marjan. Hi’j is gien femilie van mi’j, mar mien moeder gong vroeger zoemers een weke uutvanhuus in Den Haag bi’j Sipke zien moeder Neeltien. Neeltien was een zuster van een zwaoger van mien moeder. Volgen jim et nog? In ieder geval kwam ik vroeger ok wel bi’j zien moeder in Den Haag. As jonge van 17 wa’k al mit een kammeraod een dag of wat bi’j zien moeder en doe biwwe ok bi’j Sipke en Gerda en de kiender west. Die woonden daor doe ok. Doe was Sipke een jongkerel van 32 jaor. Now is hi’j een man van zowat 94 jaor. Hi’j het mit Gerda ok in Hooglaand bi’j Amersfoort woond en daor heb ik een keer optreden veur de Fryske Krite en daor weren zi’j doe ok. Ze kommen van vroeger uut de Stellingwarven. Ze hadden een gruuntewinkel in Berkoop. Sipke gong op ‘e ulo in Noordwoolde en Wolvege. En now bin al zien breurs en zusters dood en kan hi’j mit gien meens meer Stellingwarfs praoten. Dat vuult as een gemis. Vandaor dat hi’j me lessend belde awwe niet es praoten konnen. Dat doen me now dus zo now en dan via de tillefoon. En vandaege hewwe bi’j him op vesite west. We hebben eerst in de eetzael van et enorm grote gebouw, daor hi’j een mooie flat in het, een koppien sop en een brotien kroket had. En doe biwwe naor zien flat gaon en hebben een protte in et Stellingwarfs praot. Om 5 ure biwwe weer op Ni’jhooltpae an gaon. We hebben ofpraot dawwe d’r van ’t jaor nog es henne zullen. Hiel gezellig! Hieronder de trouwfoto van Sipke zien oolden: Jan Leemans en Neeltje Siegersma.