Naor Schoklaand

Et was vandaege gien echt lekker boot- en fietsweer, dat we bin d’r mit de auto op uut west naor et vroegere eilaand Schoklaand. Ik was daor wel es een peer keer eerder west, mar dat was in de veurige ieuw. We hebben eerst op et terras van et resteraant wat drinken had en een heerlike Schokker Brokke mit slagroom. En doe hewwe et prachtige museum bekeken. Dat was d’r nog niet doe ik daor veur de laeste keer was. Wat een mooi museum over de ontstaonsgeschiedenis van et eilaand. Et ontston om 1450 henne in de Zuderzee. De iene helte hiette Emmeloord en de aandere helte Ens. Laeter is et Schoklaand wodden. Veer deurveur was et subtropisch en scharrelden d’r bosolifaanten, holeberen en mouflons en zo omme. Doe koj’ lopende naor Engelaand. De meensken leefden van de visseri’je en et was d’r bittere aarmoede. Schoklaand wodde almar kleinder deurdat iedere storm d’r een hoekien van ofpakte. Totdat et uuteindelik niet meer vertrouwd was om d’r te wonen. In 1859 mos et eilaand ontruumd wodden. Dat het me toch wat west… Aj’ daor altied woond hebben en aj’ dan vot moeten. D’r bleven trouwens wel wat meensken wonen, zoas twie vuurtorenwaachters en wat warkvolk. Om 1910 henne, doe et nog altied een praktisch onbewoond eilaand was, gongen d’r wel daggiesmeensken vanuut Vollenhove mit een botien naor et eilaand. En doe wodde de Noordoostpoolder inpoolderd en was Schoklaand een eilaand op et dreuge. D’r is nog altied een verieninge daor meensken lid van binnen die van de Schokkers ofstammen. We hebben in et museum ok een mooie film bekeken. Vervolgens hewwe een aende kuierd op et eilaand. Ik hebbe een kladde mit Schokker Moppen (koekies) mit naor huus neumen. We hebben vanaovend eten had in et resteraant bi’j de Koepelbos in Berkoop. Hieronder twie foto’s die ‘k op Schoklaand maekt hebbe. Et was d’r niet echt mooi weer. D’r hongen donkere wolkens in de locht, mar d’r is gien regen uut kommen. Ik kan jim een prachtig boek over Schoklaand anrikkemederen. Et staot bi’j mi’j in de boekekaaste. Pieter Terpstra het indertied drie romans schreven: De kleine residentie, Heimwee naar het eiland en De heer van het eiland. Ze bin in iene baand uutgeven as de Schokland Trilogie. Ik wil dat nog een keer lezen!