Naor Ni’jlusen

We hadden vandaege aenlik een fietstocht maeken zuld, mar et weer was wat wisselvallig. D’r konnen bujjen kommen en d’r ston nogal wat wiend. We bin dus niet op ‘e fiets vot west, mar bin in de auto naor Ni’jlusen gaon. Daor zit in et oolde gemientehuus et Nationaol Grammefoonmuseum. Om haf twieje kregen we mit nog vuuf aandere bezukers een rondleiding deur een vri’jwilliger die oons d’r van alles over vertelde. Ie zien daor een prachtige en grote verzaemeling fonograven, grammefoons, plaetespeulders, bandrekorders en nog een hieleboel meer. Et was slim de muuite weerd. Op een bepaold mement heurden we de tenor Enrico Caruso (1873-1921) zingen. Ien van de beroemdste operazangers uut de geschiedenis. We hebben vanaovend eten had in resteraant Hof van Oldeberkoop. Hieronder twie foto’s die ‘k vandemiddag maekt hebbe. Boven: dit is et oolde gemientehuus van Ni’jlusen daor et museum in zit. Onder: de eerste jukeboks uut 1889.