Naor Genemuden

We bin vandaege deur de mist naor Genemuden west, de stad die van ’t jaor 750 jaor bestaot. In Genemuden wodt enorm vule vloerbedekking maekt. Daor warken Roemenen, Polen, Urkers… Wat ze maeken gaot echt de hiele wereld over. De vloerbedekking in de Twiede Kaemer komt uut Genemuden. Die febriek kuj’ vanzels niet bekieken, mar d’r is ok een Tapijtmuseum. Dat het lange tied dichte west en is hielemaole verbouwd en begin september hereupend deur keuninginne Màxima. Et is een prachtig museum wodden. We hebben d’r eerst wat drinken had mit wat lekkers d’r bi’j. Ie kun alles vanof et begin bekieken mit filmpies en zo. En alle oolde mesienen staon d’r en warken nog. Et begon indertied mit buzematten. Wat was et een wark om die buzems te snieden veur matten en stoelematten. En laeter kwammen de kokesmatten. De man die oons rondleidde en van alles vertelde leut de oolde mesienen evenpies dri’jen en zo zaggen we matten en trappelopers ontstaon. In et museum zat ok een man die tassen maekte veur de museumwinkel. Ik hebbe buze-onderzetters kocht. De man die oons rondleidde vertelde ok over Màxima. Ze nam rejaol de tied overal veur, ok om mit meensken te praoten. Mar d’r was almar een adjudaant bi’j heur in de buurt die de tied wel wat in de gaten hul. De man zee dat hi’j gien kussien van heur kregen hadde. Ik heurde de spiet in zien stemme deurklinken. De vri’jwilligers weren vreselik aorig. We kregen vergees ok nog wat drinken van heur. Waor maek ie zoks mit! Ik praotte vanzels Stellingwarfs en zi’j praotten dan meerst de tael van Genemuden weeromme. Dat liekt hiel arg op oonze tael. Et is allegeer Nedersaksisch. Op ‘e weerommereize hewwe nog even an west bi’j Interboat in Zwatsluus en we hebben lekker eten had in et resteraant bi’j de Koepelbos in Berkoop. Hieronder twie foto’s. Boven: dit is ien van de oolde mesienen die bi’jveurbeeld matties en trappelopers maekt. Onder: as Màxima de boel eupent is et niet vremd as d’r ok een hiele grote foto van heur hangt mit heur naosten.