Naor Gaasterlaand

Omdat et gien mooi fietsweer was, bin we d’r vandaege weer mit de auto op uut west. En wel naor et mooie Gaasterlaand. In Ooldemirdum hewwe bezukerscentrum Mar en Klif bekeken. Alles over de netuur en historie van Gaasterlaand. Butendat was d’r een mooie tentoonstelling over de waetersnoodramp van 1825. Twiedadde van Frieslaand ston doe onder waeter en West-Stellingwarf wodde et zwaorste troffen. Tegenover Mar en Klif hewwe op een terras wat drinken en een hiempien oranjegebak had. Vervolgens hewwe een mooie autotocht maekt deur hadde wiend en soms motregen. We hebben op et Mirnser Klif west. Daor stikte et van de Duutse surfers. D’r weren d’r wel zestig! Een prachtig gezicht. In Laaksem biwwe d’r ok even uut west. In de hang zit now een resteraantien. Ze hebben daor et kleinste haventien van Europa. Via et Rooie Klif biwwe naor Staveren gaon. Daor hewwe een stadskuier maekt. We hebben eten in resteraant De Fûke in Echten. Altied een hatstikke goed plakkien, mar we hebben d’r wel es lekkerder eten had. D’r mekeerde now wel et ien en aander an en we bin toch echt gien zinnige mierkerds. De volgende keer beter. Et was de hiele dag donker weer, gien mooi fotoweer dus. Hieronder toch drie foto’s van een overigens hiele mooie dag. Boven: de karke van Ooldemirdum. Midden: surfers bi’j et Mirnser Klif. Onder: dit is de fontein in Staveren, ien van de elf fonteinen.